點解同事成日可以準時收工?佢哋唔話你知嘅三大秘訣!

前排由吉高由里子飾演女主角嘅日劇《私、定時で帰ります》(港譯:我要準時下班),每集唔同主題嘅劇情,除咗講出全世界打工仔嘅心聲之外,喺劇入面亦都重新解釋「工作」嘅新定義。

但你知唔知女主角幾乎唔加班、亦幾乎唔洗加班嘅工作秘訣到底係咩?睇住同事一個個熄機收工,自己就無辦法準時走人?同事唔話係知嘅高效率竅門大公開!快啲睇下,今日一齊準時打卡收工!

  • 一定要保持枱面整潔

  你每日都要嘥時間搵重要資料?如果成日都要嘅話,呢個就係警訊!重要同不重要嘅資料如撈埋一齊,除咗容易出錯之外,亦都容易因為唔見而重新整過,加埋搵資料嘅時間亦都係令工作效率變低嘅主因。

  最好養成定時整理一下枱嘅習慣,冇辦法每日整理嘅人,最好都要一個禮拜整理一次,並且確實做好資料分類,咁樣唔止唔會浪費無謂嘅時間,亦唔會造成資料搵不到嘅焦慮同重新整過,而且乾淨整潔嘅工作環境會令精神集中,更加可以專心處理手頭上嘅工作。

  • 用memo紙提醒待辦事宜

  memo紙睇落唔起眼,但其實係非常實用又方便嘅小物品。

  利用唔同顏色或者唔同形狀嘅memo紙,將每日要做嘅寫喺上面,黐喺mon或者枱邊,每搞掂一樣就搣一張,同時提醒自己仲有邊啲待辦事項未完成,方便掌控自己嘅工作進度,呢招亦都係日劇中女主角高效率嘅決勝秘訣哦!

  訂造memo紙嘅運用亦都可以以唔同顏色嚟代表唔同緊急程度,越重要嘅就可以用越顯眼嘅顏色嚟註明,或者將工作類別結合特殊形狀,再根據個人喜好做對應分類,例如時鐘造型嘅memo紙代表自己獨立作業工作、對話框外型代表公司內部會議、燈泡款嘅代表對外拜訪客戶廠商等等,令大腦將圖案同工作類別產生連結,可以更快進入狀況。

  此外memo紙可以隨時隨貼嘅特性亦都方便調整事項順序,比起喺簿仔上面塗改,memo紙真係高效率又方便得意小工具。 

得意造型嘅memo紙仲有助於轉換心情!

  • 4+1作戰守則

  將工作內容分成4大區坦:「重要又緊急」、「重要但唔緊急」、「唔重要但緊急」、「唔重要亦唔緊急」,另外一區係要記得先從擅長嘅開始做起。

  將工作分成4大區域之後,可以清楚掌握工作狀況,明確講畀自己知deadline,同memo紙比較唔一樣嘅係,呢個方式經常用喺一個星期嘅工作進度或者月份嘅進度規劃,亦有啲人會直接佢set為wallpaper,將file同資料分類放喺唔同區域提醒自己。

  配合4區域守則,並且先從擅長嘅工作內容處理,令自己有個心理建設同準備,遇到所有事項迎面而來時先唔會覺得壓力山大或者太過焦慮。

  最後,無論咩方法都係要設定一小段嘅彈性休息時間,結束一個段落後,畀自己休息放鬆或者放空一下,都有助下個階段嘅工作,從今日就開始準時收工返屋企啦!