以往喺我哋印象之中，顏料、畫筆、紙係構成一件藝術品最主要嘅元素之一，但你有冇諗過平凡無奇嘅生活用品，其實都可以經過其他人嘅巧手之下蛻變成超乎想像、巧奪天工嘅藝術品？下面小編將為大家介紹幾款奇幻藝術品，絕對會超乎你嘅想像之外！

膠紙都可以出名畫？黏貼界嘅顏料大王

日本藝術家船原七紗 Nasa Funahara 由於對紙膠紙非常著迷，所以開始收藏，喺日本紙膠紙嘅金額唔算太高，換算港幣大約12至22元左右，由於紙膠紙有各種唔同嘅圖案、寬度同顏色，會令喜歡蒐集文具嘅人忍唔住越買越多，同時都係文具迷心目中最好嘅文具小物之一。喺一次嘅大學課堂作業，Nasa Funahara 決定用紙膠紙喛完成，除咗得到非常大嘅回饋之外，同時亦開啟咗作者佢繼續用紙膠紙創作嘅大門。

Nasa Funahara 大部分嘅作品都係以複製世界名畫為主，好似係：戴珍珠耳環的少女、蒙娜麗莎的微笑、吶喊、最後的晚餐。為咗令作品更有溫度，佢堅持用手撕而唔用鉸剪將膠紙剪成佢想要嘅形狀，因為咁樣先可以呈現作品質感嘅真實。

 

刺繡企起身？跳出平面嘅思維

「刺繡」，中國古代人嘅智慧。至今已經有兩三千年嘅歷史，曾經有人咁講過：「針係畫筆、布係畫紙、而線就係五顏六色嘅顏料。」

從古到今，刺繡唔單止可以令衣衫成為加分點。生活用品例如手巾、手袋、行李牌……等等都可以經由刺繡嘅技術同繽紛嘅繡線令佢變身成為唔同風格嘅物品，正因為刺繡線條唔變、裝飾性高、藝術效果強，所以成為電繡商品嘅商機！

以往我哋對於刺繡作品嘅印象都只係侷限喺平面上，但波蘭藝術家Justyna Wolodkiewicz 佢就嘗試咗一個唔一樣嘅創作，結合軟陶同刺繡，利用呢兩種唔同性質嘅用品創造出一個全新嘅空間概念，更加令傳統刺繡工藝推上一個更唔一樣嘅巔峰！