相信唔少人會鍾意喺個人用品上黐貼紙或者紙膠紙嚟裝飾，打造獨一無二嘅行李箱或者notebook、手機殼等等。
但你有冇發現？
魔鬼匿喺細節入面，殘膠匿喺物品入面！品質差又經歷長時間氧化、受潮嘅貼紙可能會產生頑固殘膠！
殘膠應該點清除？今日就介紹大家8種方法試一下──
（圖片來源：unsplash ）
環保去漬油
去漬油、標籤清除劑等等都可以用來清除殘膠，但根據唔同嘅表面質料，要記得揀唔傷害商品本身嘅清除劑！
網友推薦嘅環保去漬油唔單止無異味，亦唔會傷害塑膠製品或者亞加力質料商品，相當推薦。
丙酮
丙酮都可以清潔殘膠！
丙酮要喺邊度買？其實用去光水就OK，去光水嘅成分含丙酮，除啌卸指甲油，濕敷耐啲都可以去殘膠。
⚠注意：如果係表面有油墨印刷嘅商品要小心用！如果唔係會將字一齊卸走！
擦紙膠
隨手可得嘅擦紙膠都可以去殘膠，雖然比較攰同嘥時間，但就係最低成本！
⚠注意：除咗注意擦紙膠嘅品質之外，用擦紙膠清潔時，要將碎碎清走，先唔會越擦越污糟。
（圖片來源：unsplash）
風筒
風筒適合用嚟清理比較「新鮮嘅」殘膠。
喺撕之前先用風筒吹個20秒左右，殘膠就會同貼紙標籤一齊被撕走。
⚠注意：唔適合近距離接觸高溫嘅物品就唔推薦呢個方法！
（圖片來源：unsplash）
膠紙
膠紙產生嘅問題就用膠紙解決！
用乾淨嘅膠紙來回重覆黐黐黐，雖然比較嘥時間，但同樣可以好漂仔咁去殘膠。
⚠注意：膠紙清除法比較啱用喺啱啱產生嘅殘膠，面對已經有啲時間或者已經黐到灰塵嘅殘膠效果就冇咁好。
hand cream
hand cream除咗保養，亦可以拎嚟軟化殘膠。
將hand cream敷喺殘膠位，過一陣融化之後就可以慢慢摳搲走捽走，hand cream嘅質料唔單止最溫和，亦唔會有刺鼻嘅味道。
乙醇
乙醇（就係酒精）都可以用嚟清殘膠，趁住酒精仲係濕濕地嘅狀態下邊捽邊搲就OK。
⚠注意：酒精去除法會傷害亞加力製品，造成表面裂痕！所以要避免喺亞加力上用酒精清除殘膠。
綠油精
同hand cream類似嘅優點，唔會產生異味、唔傷質料又唔傷手嘅綠油精都係被人推薦用嚟去殘膠。
呢啲清潔方法都可以搭配運用，希望大家都可以好好清除乞人憎嘅殘膠！
除咗事後補救，最重要嘅係喺黐上標籤、貼紙或者紙膠紙之前一定確認好質料，同時喺撕膠紙時盡快清理同卸走，先可以避免殘膠氧化而更難處理。
________________________________________________
集比係製作訂造禮贈品嘅專業廠商，有任何特殊需求都可以為你量身訂做，製作獨一無二嘅禮贈品！
📢想知道更多詳情？
歡迎📞歡迎致電+852 24343139 、私訊FB Page或email saleshk@xebe.com
🎁更多訂造禮品都喺官網！
.
🤝想知道集比有同邊啲企業合作 ？